Türkmentelekom Bot

Türkmenistanda 11 aýda JIÖ 6,3 göterim artdy


07.12.2024

Hökümetiň sanly ulgam arkaly geçirilen nobatdaky mejlisinde wise-premýer H.Geldimyradow şu ýylyň ýanwar — noýabr aýlarynda Türkmenistanyň ykdysadyýetiniň makroykdysady görkezijileri barada döwlet Baştutanyna hasabat berdi.

Hasabatda bellenilişi ýaly, ýurduň ykdysadyýetini durnukly ösdürmek babatda görlen toplumlaýyn çäreleriň netijesinde, hasabat döwründe jemi içerki önüm 6,3 göterim artdy, şol sanda ösüş depgini senagat pudagynda 2,2 göterime, gurluşykda 11 göterime, ulag-aragatnaşyk pudagynda 7,1 göterime, söwdada 9,5 göterime, oba hojalygynda 5,3 göterime, hyzmatlar ulgamynda 8,7 göterime deň boldy. 2023-nji ýylyň degişli döwri bilen deňeşdirilende, şu ýylyň on bir aýynda jemi öndürilen önümiň möçberi 12,1 göterim artdy. Ykdysadyýetiň pudaklarynda oňyn önümçilik görkezijileri gazanyldy. Geçen ýylyň degişli döwri bilen deňeşdirilende, bölek satuw haryt dolanyşygy 12,8 göterim ýokarlandy. Daşary söwda dolanyşygynda hem durnukly ösüş gazanyldy.

Maliýeleşdirmegiň ähli çeşmeleriniň hasabyna özleşdirilen düýpli maýa goýumlaryň möçberi, geçen ýylyň degişli döwri bilen deňeşdirilende, 29,2 göterim ýokarlandy. Şeýle hem Oba milli maksatnamasynyň durmuşa geçirilişi barada hasabat berildi. Hususan-da, ýylyň başyndan bäri ýurt boýunça durmuş maksatly binalaryň we desgalaryň 49-synyň, suw we lagym arassalaýjy desgalaryň 32-siniň, ýaşaýyş jaýlarynyň 725,1 müň inedördül metriniň, inženerçilik ulgamlarynyň we desgalarynyň gurluşyk işleriniň alnyp barylýandygy habar berildi.

Türkmenistanyň Prezidenti hasabaty diňläp, ýurduň ykdysadyýetiniň ýagdaýyny seljermegi dowam etdirmegiň, Döwlet býujetiniň girdejileriniň möçberini artdyrmaga aýratyn üns bermegiň zerurdygyny belledi hem-de eýeçiliginiň görnüşine garamazdan, ähli edara-kärhanalaryň işgärlerine 20-nji dekabra çenli aýlyk zähmet haklarynyň tölenilişine berk gözegçilik etmegi, bu ugurda geçirilen işleriň netijeleri barada hasabat bermegi wise-premýere tabşyrdy diýip, TDH ýazýar.

Täzelikler

2 3 4 5 ... 10

Kömek gerekmi?

Biziň hünärmenlerimiz hemişe sizi gyzyklandyrýan soraglaryňyza jogap bermäge taýyn