Türkmentelekom Bot

Koreýanyň Sungýungwan uniwersiteti türkmen talyplary üçin kwotalaryny we talyp haklaryny artdyrar


11.02.2025

Türkmenistanyň Adatdan daşary we Doly ygtyýarly ilçisi Begenç Durdyýewiň Koreýa Respublikasynyň Sungýungwan uniwersitetiniň prezidenti Ýu Ji Bom bilen duşuşygynyň dowamynda bilim babatda möhüm ylalaşyklar gazanyldy. 10-njy fewralda geçirilen gepleşikler türkmen talyplarynyň abraýly bilim almagy üçin täze mümkinçilikleri açar – diýlip, türkmen diplomatik wekilhanasynyň sosial ulgamdaky sahypasynda habar berilýär.

Uniwersitetiň prezidenti amaly-tejribe ylymlar boýunça ýokary akademiki netijeleri görkezen Türkmenistanyň ýokary okuw mekdepleriniň uçurymlary üçin STEM (Ylym, tehnologiýa, inženerçilik, matematika) maksatnamasy boýunça magistraturada okamaga mümkinçilik döretmäge taýýardygyny tassyklady. Hyzmatdaşlykda Türkmenistanyň Oguzhan adyndaky Inžener-tehnologiýa uniwersiteti we Türkmen döwlet ykdysadyýet we dolandyryş instituty bilen özara gatnaşyklara aýratyn üns berler.

Akademiki hyzmatdaşlygy giňeltmegiň çäklerinde türkmen talyplary üçin kwotalary artdyrmak we talyp haklary maksatnamasyny giňeltmek meselesi ara alnyp maslahatlaşyldy. Bu karar iki ýurduň arasynda bilim babatdaky gatnaşyklary pugtalandyrmakda möhüm ädim bolar.

Türkmenistanyň ilçisiniň Sungýungwan uniwersitetinde türkmen dili okuw-kurslaryny girizmek baradaky teklibi bellenmäge mynasypdyr, bu bolsa medeni alyş-çalyşa we koreý talyplarynyň dil başarnyklaryny giňeltmäge ýardam eder.

Duşuşygyň dowamynda şeýle hem Türkmenistanyň Bitaraplygynýň 30 ýyllygy mynasybetli halkara çärelerini geçirmek baradaky meýilnamalar we BMG-niň Baş Assambleýasynyň Kararnamasyna laýyklykda 2025-nji ýyly «Halkara parahatçylyk we ynanyşmak ýyly» diýip yglan etmek başlangyjy ara alnyp maslahatlaşyldy.

Türkmenistan bilen Sungýungwan uniwersitetiniň arasynda hyzmatdaşlygyň berk binýadynyň bardygyny bellemek gerek: 2015-nji ýylda bu uniwersitet Türkmenistanyň Prezidentine hormatly doktor derejesini beripdi.

Täzelikler

2 3 4 5 ... 10

Kömek gerekmi?

Biziň hünärmenlerimiz hemişe sizi gyzyklandyrýan soraglaryňyza jogap bermäge taýyn