Türkmenistan Türki Döwletleriň Guramasynyň Utgaşdyryjy komitetiniň mejlisine gatnaşdy


14.03.2025

12-nji martda Stambul şäherinde ýerleşýän Türki Döwletleriň Guramasynyň (TDG) sekretariatynyň binasynda guramanyň Utgaşdyryjy komitetiniň 5-nji mejlisi geçirildi. Bu mejlise Türkmenistanyň Türkiýe Respublikasyndaky Ilçisi M.Işangulyýew gatnaşdy.

Şeýle hem, duşuşyga Azerbaýjanyň, Gazagystanyň, Gyrgyz Respublikasynyň, Türkiýäniň, Özbegistanyň daşary işler ministrleriniň orunbasarlary, Wengriýanyň Türkiýedäki Ilçisi, TDG-niň, TÜRKSOÝ-yň we TÜRKPA-nyň Baş sekretarlary hem-de Türki Akademiýasynyň, Türki halklaryň medeniýet we miras gaznasynyň we Türk maýa goýum gaznasynyň ýolbaşçylary gatnaşdylar.

Mejlisiň çäklerinde TDG-niň 11-nji Sammitiniň çäklerinde kabul edilen çözgütleriň ýerine ýetirilşi, TDG-niň çäklerindäki bilelikdäki hyzmatdaşlyk hem-de 2025-nji ýylyň dowamynda ýerine ýetiriljek işleriň Meýilnamasy ara alnyp maslahatlaşyldy. Bulardan başgada, Türki hyzmatdaşlyk Guramalarynyň ýolbaşçylary 2024-nji ýylyň dowamynda ýerine ýetirilen işler boýunça öz hasabatlary bilen çykyş etdiler.

Mejlisde Türkmenistanyň wekiliýeti parahatçylyk we ynanyşmak mowzugynyň ähmiýetine ünsi çekdi. Türkmenistanyň Ilçisi gatnaşanlara ýurdumyzyň bu ugurda alyp barýan işleri barada giňişleýin maglumat berdi we 2025-nji ýylda ýurdumyzyň dialogy ösdürmegiň, halkara hyzmatdaşlygyny pugtalandyrmagyň we durnukly parahatçylygy üpjün etmegiň binýady bolan hemişelik Bitaraplygymyzyň 30 ýyllygynyň belleýändiginiň aýratyn mana eýedigini nygtady.

Şeýle hem, türkmen wekiliýeti mejlise gatnaşyjylaryň ünsüni Türkmenistanyň başlangyjy bilen BMG-niň Baş Assambleýasynyň 2025-nji ýyly Halkara parahatçylyk we ynanyşmak ýyly diýip yglan etmek baradaky Kararnamasyny kabul etmeginiň ähmiýetine çekdi. Şunuň bilen baglylykda, parahatçylygy we ynanyşmagy berkitmek ugrunda halkara tagallalaryny birleşdirmäge gönükdirilen Türkmenistanyň daşary syýasatynyň orny bellendi.




Täzelikler

2 3 4 5 ... 10

Kömek gerekmi?

Biziň hünärmenlerimiz hemişe sizi gyzyklandyrýan soraglaryňyza jogap bermäge taýyn