Türkmentelekom Bot

Özbegistanyň Suw hojalygy ministrliginiň wekiliýeti Türkmenistana iş sapary bilen geldi


18.03.2025

Özbegistanyň «Dunýo» agentliginiň habar bermegine görä, ýurduň Suw hojalygy ministrliginiň wekiliýeti Türkmenistana iş sapary bilen geldi.

Türkmenabat şäherinde Türkmenistanyň we Özbegistanyň suw hojalygy edaralarynyň ýolbaşçylarynyň hem-de hünärmenleriniň gatnaşmagynda duşuşyk geçirildi. Onuň dowamynda suw hojalygy pudagyndaky hyzmatdaşlyk meseleleri, hususan-da, suw desgalarynyň dolandyrylyşy we döwrebaplaşdyrylyşy, Amyderýa derýasynda suw joşmalarynyň öňüni almak we kenar berkitme işleri geçirmek, suw serişdeleriniň rejeli peýdalanylyşy bilen bagly meseleler ara alnyp maslahatlaşyldy.

Geçirilen gepleşikleriň netijesinde taraplar Amyderýanyň suwuny rejeli ulanmak we suw ýitgileriniň öňüni almak maksady bilen, bilelikde zerur gidrotehniki çäreleri geçirmek barada ylalaşdylar.

Mundan başga-da, serhetýaka suw desgalarynda bilelikdäki ylmy-barlag işlerini geçirmek, suw tygşytlaýjy tehnologiýalary ornaşdyrmak we suw serişdeleriniň hasabyny sanly ulgama geçirmek boýunça tejribe alyşmak, şeýle hem suw hojalygy pudagy üçin hünärmenleri taýýarlamak ugrunda hyzmatdaşlyk etmek barada ylalaşyk gazanyldy.

Duşuşygyň çäklerinde Türkmenistanyň we Özbegistanyň suw hojalygy edaralarynyň wekilleri Düýeboýun suw bölüji desgasyna baryp gördüler we onuň netijeli işlemegini üpjün etmek boýunça bilelikdäki çäreleri ýerinde ara alyp maslahatlaşdylar.

Täzelikler

2 3 4 5 ... 10

Kömek gerekmi?

Biziň hünärmenlerimiz hemişe sizi gyzyklandyrýan soraglaryňyza jogap bermäge taýyn