Tomusky dynç alyşdan öň «Awaza» syýahatlaryň onlaýn sargyt edilmegine gyzyklanma barha artýar

Türkmenistanda ýazky syýahatçylyk möwsümi dowam edýär, öňde bolsa tomusky dynç alyşlar möwsümi bar. «Awaza» milli syýahatçylyk zolagyna syýahat etmegi meýilleşdirýänler üçin e.gov.tm portaly arkaly biletleri onlaýn satyn almak boýunça amatly hyzmat elýeterlidir.

Platforma arkaly uçara, otla ýa-da awtobusa biletleri öňünden sargyt etmek mümkinçiligi döredildi. Munuň üçin «Ulag, logistika we gümrük hyzmaty» bölümine girip, degişli ulag görnüşini we ugruny saýlamak ýeterlikdir.

Bu hyzmat kassalara baryp, nobata durmazdan syýahaty tiz meýilleşdirmäge mümkinçilik berýär. Töleg «Altyn Asyr» bank kartlary arkaly amala aşyrylýar, bu bolsa satyn alyş işini has-da amatly edýär.

Portal 24 sagat işleýär, şonuň üçin ulanyjylar islendik wagtda syýahatyny sargyt edip, Hazar deňziniň kenaryndaky tomusky dynç alşa öňünden taýýarlanyp bilerler.