Türkmentelekom Bot

Gurbanguly Berdimuhamedow Walentina Matwiýenko bilen telefon arkaly söhbetdeş boldy


19.03.2025

Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Russiýa Federasiýasynyň Federal Ýygnagynyň Federasiýa Geňeşiniň Başlygy Walentina Matwiýenkonyň arasynda telefon arkaly söhbetdeşlik boldy. Bu barada «Watan» habarlar gepleşiginde habar berildi.

Bellenilişi ýaly, söhbetdeşlikde türkmen halkynyň Milli Lideri Türkmenistan bilen Russiýa Federasiýasynyň arasyndaky dostlugy we strategik hyzmatdaşlygy pugtalandyrmaga uly şahsy goşandy üçin Walentina Matwiýenko minnetdarlyk bildirdi.

Öz gezeginde, Walentina Matwiýenko Türkmenistanyň Halk Maslahatynyň Başlygyna iki ýurduň arasyndaky netijeli gatnaşyklary pugtalandyrmak babatda alyp barýan işine beren ýokary bahasy üçin hoşallyk bildirdi. Ol Russiýanyň iki ýurduň halklarynyň arasyndaky özara bähbitli gatnaşyklary pugtalandyrmak ugruna berk ygrarlydygyny tassyklady.

Telefon arkaly söhbetdeşligiň barşynda türkmen halkynyň Milli Lideri Türkmenistanda Russiýa Federasiýasy bilen dostlukly gatnaşyklara ýokary baha berilýändigini nygtady hem-de türkmen döwletiniň dürli ugurlar boýunça ikitaraplaýyn hyzmatdaşlygyň mümkinçiliklerini artdyrmaga çalyşýandygyny belledi. Şunda Russiýa Federasiýasynyň Federal Ýygnagynyň Federasiýa Geňeşiniň Başlygynyň häzirki wagtda, şeýle hem uzak möhletli geljekde bu işde möhüm orun eýelejekdigine berk ynam bildirildi.

Söhbetdeşlikde özara gatnaşyklaryň täze formatlaryny döretmek we olaryň netijeli hereket etmegini üpjün etmek boýunça durmuşa geçirilen başlangyçlaryň ähmiýetine üns berildi. Hususan-da, Walentina Matwiýenkonyň goldaw bermeginde parlamentara hyzmatdaşlygyň möhüm ugry — Merkezi Aziýa döwletleriniň we Russiýa Federasiýasynyň parlamentarileriniň duşuşyklary barada gürrüň edildi. Şunda «Merkezi Aziýa — Russiýa» zenanlar dialogynyň täze ösüşe eýe bolandygy nygtaldy.

— Şu formatlaryň çäklerindäki ilkinji çäreler 2022-nji ýylyň maý aýynda geçirildi — diýip, Türkmenistanyň Halk Maslahatynyň Başlygy aýtdy we parlamentarileriň nobatdaky duşuşygyny hem-de Merkezi Aziýa ýurtlarynyň we Russiýanyň zenanlarynyň dialogyny guramagy teklip etdi.

Türkmen-rus hyzmatdaşlygynyň häzirki ýagdaýyny we geljegini ara alyp maslahatlaşmagyň çäklerinde giň gerimli döwletara dialogy ösdürmek işinde, ony hil taýdan täze many-mazmun bilen baýlaşdyrmakda iki ýurduň parlamentarileriniň möhüm orny bellenildi. Şeýle hem medeni-ynsanperwer gatnaşyklary, hususan-da, bilim, ylym, saglygy goraýyş we medeniýet ulgamlarynda hyzmatdaşlygy pugtalandyrmak bilen bagly meseleler ara alnyp maslahatlaşyldy. Taraplaryň bu ugurlarda gatnaşyklary işjeňleşdirmäge çalyşýandygy tassyklanyldy.

Täzelikler

2 3 4 5 ... 10

Kömek gerekmi?

Biziň hünärmenlerimiz hemişe sizi gyzyklandyrýan soraglaryňyza jogap bermäge taýyn