Türkmentelekom Bot

Halk Maslahatynyň Başlygy Arkadag şäherinde guruljak önümçilik desgalarynyň taslamalary bilen tanyşdy


04.08.2024

3-nji awgustda türkmen halkynyň Milli Lideri, Türkmenistanyň Halk Maslahatynyň Başlygy, Hormatly il ýaşulusy Gurbanguly Berdimuhamedow Arkadag şäherine nobatdaky iş saparyny amala aşyrdy. Bu barada "Watan" habarlar gepleşiginde habar berildi.

Bellenilişi ýaly, Gahryman Arkadag täze şäheriň önümçilik desgalarynyň taslamalary bilen tanyşdy hem-de dikuçarda Arkadag şäheriniň gurluşygynyň ikinji tapgyrynda alnyp barylýan işleri, önümçilik toplumlarynyň ýerleşjek ýerlerini synlady.

Türkmenistanyň at gazanan arhitektory Gurbanguly Berdimuhamedow görkezilen taslamalara birnäçe belliklerini aýdyp, olara degişli düzedişleri girizdi. Çeper halyçylyk kärhanasynyň täze şäheriň binagärlik keşbi bilen bir bitewi sazlaşygy emele getirmegine, onuň ekologiýa derejesine we binanyň ýerleşiş aýratynlyklaryna möhüm ähmiýet berilmelidir diýip, Gahryman Arkadag belledi we bu babatda degişli ýolbaşçylara birnäçe anyk tabşyryklary berdi.

Soňra Gahryman Arkadagyň dikuçary Aşgabatdan Arkadag şäherine tarap ugur aldy.

Türkmen halkynyň Milli Lideri guşuçar belentlikden Arkadag şäheriniň çäginde alnyp barylýan işleri, şäheriň binalarynyň ýerleşiş aýratynlyklaryny, ulag ýollarynyň hereketini synlady.

Uçuşyň dowamynda Çeper halyçylyk kärhanasynyň ýerleşjek ýerini synlap, Gahryman Arkadag önümçilik toplumynyň gurluşyk işlerine, onuň enjamlaşdyrylyşyna bolşy ýaly, kärhananyň işiniň ekologiýa talaplaryna laýyk derejede ýola goýulmagyna möhüm ähmiýet berilmelidigini belledi we bu babatda birnäçe görkezmeleri berdi. Aýratyn-da, önümçilik toplumlarynyň golaýynda ugurdaş desgalaryň ýerleşdirilmeginiň talabalaýyk boljakdygy barada aýdyldy.

Şeýle hem Gahryman Arkadag täze şäheriň gurluşygynyň ikinji tapgyrynda bina ediljek lukmançylyk klasteriniň desgalarynyň ýerleşjek ýerlerini synlady.

Bellenilişi ýaly, täze toplumyň gurulmagy diňe bir saglygy goraýyş ulgamynyň işini döwrebaplaşdyrmak bilen çäklenmän, eýsem, milli ykdysadyýetiň kuwwatyny artdyrmaga ýardam eder hem-de täze iş orunlarynyň döredilmegini şertlendirer. Bu bolsa täze şäheriň eksport mümkinçilikleriniň artmagynda bolşy ýaly, şäher ilatynyň durmuş üpjünçiliginiň gowulanmagynda-da ähmiýetlidir.

Täzelikler

2 3 4 5 ... 10

Kömek gerekmi?

Biziň hünärmenlerimiz hemişe sizi gyzyklandyrýan soraglaryňyza jogap bermäge taýyn