Türkmenistanyň Prezidenti “Buig” kompaniýasynyň ýolbaşçylaryny kabul etdi


27.09.2024

26-njy sentýabrda hormatly Prezidentimiz Serdar Berdimuhamedow “Buig” kompaniýasynyň Baş direktorynyň orunbasary Edward Buigi, dolandyryjylar geňeşiniň agzasy William Buigi we “Buig Batiman International” kompaniýasynyň ýolbaşçysy Pýer-Erik Sen-Andreni kabul etdi.

Meşhur fransuz kompaniýasynyň ýolbaşçylary wagt tapyp kabul edendigi üçin hoşallyk bildirip, döwlet Baştutanymyzy ýetip gelen milli baýram — ýurdumyzyň Garaşsyzlygynyň 33 ýyllygy bilen tüýs ýürekden gutladylar we ähli türkmen halkyna bagtyýarlyk, parahatçylyk, rowaçlyk arzuw etdiler.

Hormatly Prezidentimiz myhmanlary Türkmenistanyň Garaşsyzlyk gününiň öňüsyrasynda mähirli mübärekläp, gutlaglarydyr hoşniýetli arzuwlary üçin minnetdarlyk bildirdi. Indi ençeme ýyllaryň dowamynda “Buig” kompaniýasy türkmen bazarynda üstünlikli işleýär. Şu geçen ýyllarda kompaniýa özüni ygtybarly hyzmatdaş hökmünde görkezdi. Onuň durmuşa geçiren taslamalary hil babatda halkara standartlara doly laýyk gelýär diýip, döwlet Baştutanymyz aýtdy we şu gezekki saparyň ikitaraplaýyn hyzmatdaşlygy giňeltmekde, “Buig” kompaniýasynyň Türkmenistandaky işiniň anyk ugurlaryny kesgitlemekde möhüm ädim boljakdygyna ynam bildirdi.

Hormatly Prezidentimiz kompaniýanyň Türkmenistanda soňky 30 ýylyň dowamynda alyp baran giň gerimli taslamalaryna ýokary baha berip, geçen döwrüň içinde köp işleriň ýerine ýetirilendigini kanagatlanma bilen belledi. “Buig” kompaniýasy öz üstüne alan borçnamalaryny üstünlikli amala aşyrýar, bilelikdäki taslamalar bolsa ýurdumyzyň ykdysadyýetiniň ösmegine, gurluşyk, senagat kuwwatynyň artmagyna saldamly goşant goşmak bilen, şäher bezeginiň nusgalarynyň örän baýdygyny görkezýär. Türkmenistan hyzmatdaşlyk üçin hemişe açykdyr we uly önümçilik kuwwatyna eýe bolan kompaniýalar bilen gatnaşyklary pugtalandyrmaga taýýardyr. “Buig” kompaniýasy hem şolaryň hatarynda mynasyp orny eýeleýär diýip, döwlet Baştutanymyz nygtady.

Işjeň ýagdaýda geçen duşuşygyň dowamynda ynanyşmak, özara bähbitlilik esasynda guralýan köpýyllyk hyzmatdaşlygy mundan beýläk-de ösdürmegiň meseleleri ara alnyp maslahatlaşyldy.

Işewürler bildirilen ýokary ynam we hemmetaraplaýyn goldaw üçin hoşallyk bildirip, “Buig” kompaniýasynyň geljegi uly türkmen bazarynda eýeleýän ornuny has-da pugtalandyrmaga uly gyzyklanma bildirýändigini tassykladylar. Bellenilişi ýaly, kompaniýa mundan beýläk-de üstüne alan şertnamalaýyn borçnamalaryna berk eýermek bilen, özüne ynanylan taslamalary üstünlikli durmuşa geçirmek üçin ähli tagallalary eder.

Hormatly Prezidentimiz Serdar Berdimuhamedow hyzmatdaşlygy mundan beýläk-de ösdürmek babatda oňat mümkinçilikleriň bardygyny aýdyp, türkmen tarapynyň däp bolan hyzmatdaşlygy pugtalandyrmaga hem-de kompaniýanyň anyk tekliplerine garamaga taýýardygyny nygtady.

Duşuşygyň ahyrynda döwlet Baştutanymyz we “Buig” kompaniýasynyň ýolbaşçylary birek-birege iň gowy arzuwlaryny beýan edip, toplanan oňyn tejribäni, täze taryhy döwrüň uly wezipelerini nazara almak bilen, bilelikdäki işiň üstünlikli dowam etdiriljekdigine ynam bildirdiler.

Täzelikler

2 3 4 5 ... 10

Kömek gerekmi?

Biziň hünärmenlerimiz hemişe sizi gyzyklandyrýan soraglaryňyza jogap bermäge taýyn