Türkmenistanda Belgiýa Patyşalygynyň Adatdan daşary we Doly ygtyýarly ilçisi işe başlady


11.12.2024

Onuň Alyhezreti, 
Türkmenistanyň Prezidenti 
Serdar BERDIMUHAMEDOWA

Jenap Prezident!

Ýurtlarymyzyň arasyndaky hoşniýetli gatnaşyklary goldamaga we pugtalandyrmaga çalyşmak bilen, biz jenap Žýulen de Fraýpony Belgiýa Patyşalygynyň Türkmenistandaky Adatdan daşary we Doly ygtyýarly ilçisi wezipesine bellemek kararyna geldik. Jenap de Fraýponyň iş başarjaňlygy, ýokary şahsy häsiýetleri öz üstüne ýüklenen wezipesini Siziň Alyhezretiňiziň makullamagyna mynasyp derejede ýerine ýetirjekdigine ynam döredýär. Ony hoşniýetli kabul etmegiňizi we Size biziň adymyzdan ähli beýan etjeklerine, hususan-da, Siziň Alyhezretiňize belent sarpa goýýandygymyz baradaky ynandyrmalarymyzy ýetirende, oňa doly ynanmagyňyzy haýyş edýäris.

FILIPP,
Belgiýanyň Patyşasy.

***

Şu gün hormatly Prezidentimiz Serdar Berdimuhamedowyň tabşyrygy boýunça Mejlisiň Başlygy D.Gulmanowa Belgiýa Patyşalygynyň Türkmenistanda täze bellenen Adatdan daşary we Doly ygtyýarly ilçisi Žýulen de Fraýpondan ynanç hatyny kabul etdi.

Milli parlamentiň ýolbaşçysy ilçini döwlet Baştutanymyzyň adyndan Türkmenistanda işe başlamagy bilen gutlap, oňa iki ýurduň arasynda dostluk, hyzmatdaşlyk gatnaşyklaryny berkitmegiň bähbidine gönükdirilen jogapkärli diplomatik wezipesinde üstünlikleri arzuw etdi.

Hoşniýetli sözler we bildirilen myhmansöýerlik üçin hoşallyk bildirip, Belgiýanyň doly ygtyýarly wekili Belgiýanyň Patyşasy Filippiň hormatly Prezidentimiz Serdar Berdimuhamedowa, türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyza iberen mähirli salamyny, iň gowy arzuwlaryny ýetirdi.

Netijeli ýagdaýda geçen duşuşygyň dowamynda ilçi döwletimiziň alyp barýan içeri we daşary syýasatynyň ileri tutulýan ugurlary bilen giňişleýin tanyşdyryldy. Umumy bähbitleriň hatyrasyna giň halkara hyzmatdaşlygy ösdürmek bu syýasatyň möhüm ugrudyr. Milli parlamentiň ýolbaşçysy ýurdumyzda alnyp barylýan giň gerimli özgertmelere daşary ýurtly hyzmatdaşlaryň gyzyklanmalaryny göz öňünde tutup, halkymyzyň bagtyýarlygynyň, rowaçlygynyň bähbidine durmuşa geçirilýän giň gerimli işleriň esasy maksatlary we wezipeleri barada gürrüň berdi. Durmuş ugurly döwlet syýasatyna aýratyn üns çekildi. Onuň çäklerinde Diýarymyzyň ähli künjeklerinde döwrebap çagalar baglarynyň, mekdepleriň, lukmançylyk, ylmy merkezleriniň, sport we medeni maksatly desgalaryň, oňaýly ýaşaýyş jaýlarynyň gurluşyklary güýçli depginde alnyp barylýar. Söhbetdeşligiň dowamynda ikitaraplaýyn we köptaraplaýyn esasda, iri halkara guramalaryň çäklerinde üstünlikli alnyp barylýan döwletara hyzmatdaşlygyň möhüm ugurlary barada pikir alşyldy.

Türkmen-belgiýa parlamentara gatnaşyklaryny işjeňleşdirmegiň mümkinçilikleri maslahatlaşmalaryň aýratyn meselesi boldy. Bellenilişi ýaly, bu gatnaşyklaryň giňeldilmegi syýasy-diplomatik, söwda-ykdysady, medeni-ynsanperwer dialogyň işjeňleşdirilmegine ýardam eder.

Duşuşygyň ahyrynda Belgiýa Patyşalygynyň Türkmenistandaky Adatdan daşary we Doly ygtyýarly ilçisi Žýulen de Fraýpon iki ýurduň arasynda däp bolan hyzmatdaşlygy çuňlaşdyrmakda hem-de dostlukly gatnaşyklary mundan beýläk-de berkitmekde ähli tagallalaryny gaýgyrmajakdygyna ynandyrdy.

Täzelikler

2 3 4 5 ... 10

Kömek gerekmi?

Biziň hünärmenlerimiz hemişe sizi gyzyklandyrýan soraglaryňyza jogap bermäge taýyn