Türkmentelekom Bot

Aşgabatda talyplara niýetlenen «Türkiye Bursları» talyp haklary maksatnamasy bilen tanyşdyryldy


31.01.2025

30-njy ýanwarda Türkiýäniň ilçihanasynyň ýanyndaky Türk medeni merkezinde ýurduň ýokary bilim ulgamyndaky esasy maksatnamasy bolan «Türkiye Bursları» halkara talyp haklary maksatnamasynyň onlaýn tanyşdyrylyşy geçirildi – diýip, Türkiýäniň Aşgabatdaky ilçihanasynyň sosial ulgam sahypasynda habar berilýär.

Ozal Türkiýäniň ilçisi Ahmet Demirok türkmen talyplary bilen duşuşykda maksatnama gatnaşmak üçin arzalaryň 2025-nji ýylyň 10-njy ýanwaryndan 20-nji fewrala çenli kabul edilýändigini aýdypdy. Onuň sözlerine görä, maksatnamanyň 1992-nji ýyldan bäri hereket edip gelýän döwründe 5000-den gowrak türkmen talyby Türkiýede bilim almak mümkinçiligine eýe boldy. Geçen ýyl 45 adam talyp hakyny aldy.

«Türkiye Bursları» — daşary ýurtly talyplaryň türk uniwersitetlerinde ýokary bilim almaklaryny goldamaga gönükdirilen Türkiýäniň döwlet talyp haklary maksatnamasydyr. Bu maksatnama ýylda 5000 talyp hakyny berýär we

Türkiýäniň daşary ýurtly talyplar üçin iň uly talyp haklary maksatnamasy bolup durýar. Maksatnama aýlyk talyp haky görnüşinde maliýe goldawyny bermek bilen bir hatarda, okuw, ýaşaýyş jaý, lukmançylyk ätiýaçlandyryş we ulag çykdajylaryny hem öz içine alýar.

Maksatnama gatnaşmaklyga isleg bildirýänler turkiyeburslari.gov.tr resmi saýty arkaly arza berip bilerler. Maksatnama bakalawriat, magistratura we doktorantura boýunça talyplar üçin açyk bolup, dürli bilim ugurlarynda okamak mümkinçiligini berýär.

Täzelikler

2 3 4 5 ... 10

Kömek gerekmi?

Biziň hünärmenlerimiz hemişe sizi gyzyklandyrýan soraglaryňyza jogap bermäge taýyn