Aşgabatda BMG-niň binasynda Howa boýunça ösüş hyzmatdaşlarynyň toparynyň nobatdaky duşuşygy geçirildi


07.02.2025

Birleşen Milletler Guramasynyň Ösüş Maksatnamasy (BMGÖM) we Beýik Britaniýanyň Türkmenistandaky ilçihanasy tarapyndan Howa boýunça ösüş hyzmatdaşlarynyň toparynyň sekizinji utgaşdyryjy maslahaty geçirildi.

Duşuşyk 5-nji fewralda Aşgabatda BMG-niň binasynda Türkmenistanyň Pariž ylalaşygy boýunça halkara borçnamalaryny ýerine ýetirmekdäki ösüşini çaltlandyrmak maksady bilen geçirildi — diýlip, BMGÖM-niň metbugat habarynda bellenilýär.

BMG-niň edaralarynyň, diplomatik wekilhanalarynyň we döwlet edaralarynyň wekilleri hyzmatdaşlyk gatnaşyklaryny pugtalandyrmak, ösüş başlangyçlaryny howanyň üýtgemegi boýunça ileri tutulýan ugurlary bilen utgaşdyrmak we ýurduň az uglerodly geljege geçmegini goldamak barada pikir alyşdylar.

BMGÖM-niň Türkmenistandaky hemişelik wekili Narine Saakýan şeýle belledi:

«Bu duşuşyk Türkmenistanyň howa boýunça maksatlaryny goldamakda berk ygrarlydygyny nygtaýar. Ähli tagallalarymyzy birleşdirip, az uglerodly geljege bolan ýolda ösüşi çaltlandyrmak bilen, biz Türkmenistanyň bu dünýä ähmiýetli wajyp meseläni çözmäge goşandyny üpjün edip bileris».

Duşuşykda ýurduň howa meseleleriniň, şol sanda BMG-niň Howanyň üýtgemegi boýunça maslahatynyň (KS29/COP29) netijeleri boýunça geçirilen çäreler baradaky täzelenen maglumatlar we 2025-nji ýylyň 10-21-nji noýabrynda Braziliýanyň Belen şäherinde geçiriljek COP30 howa sammitine taýýarlyk görmegiň meseleleri ara alnyp maslahatlaşyldy.

Şeýle hem duşuşykda Türkmenistanyň indiki Milli derejede kesgitlenýän goşandynyň işlenip taýýarlanmagyny we mundan beýläk durmuşa geçirilmegini goldamak, howanyň üýtgemegine garşy göreşmek we parnik gazlarynyň zyňyndylaryny azaltmak babatda hyzmatdaşlygy giňeltmek mümkinçiliklerini öwrenmek, şeýle hem sebit howa maksatnamalary, energetika we suw howpsuzlygy meseleleri ara alnyp maslahatlaşyldy.

Beýik Britaniýanyň Türkmenistandaky ilçisi Stiwen Konlon şeýle belledi:

«Pariž ylalaşygyna laýyklykda, ähli taraplar her 5 ýylda zyňyndylary azaltmak boýunça özleriniň Milli derejede kesgitlenýän goşantlaryny bermäge borçludyrlar. Beýik Britaniýanyň hökümeti Pariž ylalaşygynyň özüne degişli paýyny ýerine ýetirmek boýunça täzelenen meýilnamasyny soňky möhletden üç aý öň täzelenen MDKG-ny berip, 1990-njy ýylyň derejesine görä 2035-nji ýyla çenli ähli parnik gazlarynyň zyňyndylaryny azyndan 81% azaltmagy wada berdi we ony resmi taýdan tassyklady. Men Beýik Britaniýanyň bu irki we uly maksatly MDKG-synyň COP30-dan öň beýleki ýurtlary, şol sanda Türkmenistany hem şol derejedäki maksatlary kabul etmäge höweslendirer diýip umyt edýärin».
***
Howa boýunça ösüş hyzmatdaşlarynyň utgaşdyryjy toparynyň maslahatlary yzygiderli geçirilýär we häzirki işler hem-de Türkmenistanyň howanyň üýtgemeginiň netijelerini ýumşatmak, durnuklylygyny ýokarlandyrmak we uýgunlaşma çärelerini güýçlendirmek boýunça tagallalaryny goldamaga gönükdirilip, ähli meýilleşdirilen taslamalar barada maglumat alyşmak üçin platforma bolup hyzmat edýär.

Täzelikler

2 3 4 5 ... 10

Kömek gerekmi?

Biziň hünärmenlerimiz hemişe sizi gyzyklandyrýan soraglaryňyza jogap bermäge taýyn