Türkmentelekom Bot

Türkmenistanyň Prezidenti Halkara sergiler býurosynyň Baş sekretaryny kabul etdi


19.03.2025

Şu gün Türkmenistanyň Prezidenti Serdar Berdimuhamedow Halkara sergiler býurosynyň Baş sekretary Dimitri Kerkentzesi kabul etdi. «Watan» habarlar gepleşiginde habar berlişi ýaly, duşuşykda myhman Halkara sergiler býurosynyň Türkmenistan bilen däp bolan gatnaşyklary giňeltmäge gyzyklanma bildirýändigini aýtdy. Ol Türkmenistanyň Senagatçylar we telekeçiler birleşmesiniň döredilmeginiň 17 ýyllygy mynasybetli Aşgabatda geçirilýän serginiň ýokary guramaçylyk derejesini hem aýratyn belledi.

Prezident Serdar Berdimuhamedow Baş sekretar Dimitri Kerkentzesiň bu saparynyň Türkmenistan bilen Halkara sergiler býurosynyň arasyndaky hyzmatdaşlygy mundan beýläk-de pugtalandyrmaga goşant goşjakdygyna berk ynam bildirdi.

Duşuşygyň dowamynda abraýly halkara guramalar bilen hyzmatdaşlygy ilerletmegiň Türkmenistanyň alyp barýan daşary syýasatynyň esasy ugurlarynyň biri bolup durýandygy bellenildi. Şunda Türkmenistan bilen Halkara sergiler býurosynyň arasynda ýola goýlan hyzmatdaşlygyň hem netijeli häsiýeti nygtaldy. Söhbetdeşler söwda-ykdysady gatnaşyklary ösdürmekde, bütindünýä ykdysady işinde we özara bähbitli hyzmatdaşlygy alyp barmakda halkara sergileriň möhüm ähmiýetini bellediler.

Duşuşygyň barşynda bellenilişi ýaly, Türkmenistanda halkara söwda-ykdysady hyzmatdaşlygy giňeltmek boýunça maksatnamalaýyn işler amala aşyrylýar. «Türkmenistanyň halkara sergi işiniň 2024 – 2025-nji ýyllar üçin Konsepsiýasyna» laýyklykda, Halkara sergiler býurosy bilen hem netijeli gatnaşyklary ösdürmäge möhüm ähmiýet berilýär. Türkmenistan Halkara sergiler býurosynyň agzasy bolmak bilen, dürli ýurtlarda geçirilýän bütindünýä we ýöriteleşdirilen sergilere işjeň gatnaşýar.

Prezident Serdar Berdimuhamedow söhbetdeşlikde şu ýylyň aprel aýynda Ýaponiýanyň Osaka şäherinde geçiriljek «EKSPO – 2025» Bütindünýä sergisine Türkmenistanyň hem işjeň gatnaşjakdygyny aýdyp, onuň üstünlikli geçirilmegi baradaky arzuwlaryny beýan etdi. Halkara sergiler býurosy bu çäräniň guramaçysy bolup çykyş edýär.

Duşuşygyň ahyrynda Prezident Serdar Berdimuhamedow Türkmenistanyň geljekde hem halkara ähmiýetli we ählumumy ösüşi maksat edinýän sergileri geçirmäge, bu ugurda netijeli gatnaşyklary pugtalandyrmaga taýýardygyny tassyklady hem-de Halkara sergiler býurosynyň Baş sekretary Dimitri Kerkentzese alyp barýan işinde üstünlikleri arzuw etdi.

 

Täzelikler

2 3 4 5 ... 10

Kömek gerekmi?

Biziň hünärmenlerimiz hemişe sizi gyzyklandyrýan soraglaryňyza jogap bermäge taýyn